¿Qué ye la Rede Europea de Ciudaes de la Sidra? – Cider Cities –
Cider Cities ye una Rede de Ciudaes de la Xunión Europea establecida al traviés de la sidra y la mazana como venceyos d’unidá y desenvolvimientu.
Trátase d’una ferramienta que facilita y reforcia la inserción internacional de los gobiernos llocales y rexionales, desenvolviendo oportunidaes de cooperación internacional descentralizada, con intercambiu de conocencies, propuestes y soluciones (alternatives).
¿Esisten precedentes?
La Rede de Ciudaes de la Mazana y la Sidra ye la primera que se constitúi con esti venceyu y, de momentu, la única esistente, anque sí hai munches redes asemeyaes d’ámbitu internacional. Concretamente, nel ámbitu de la Xunión Europea esisten, por exemplu, la Rede Europea de Ciudaes del Viñu o la Rede Europea de Ciudaes del Quesu, nos que’l venceyu s’establez a partir del viñu o del quesu, respectivamente.
¿Por qué d’ámbitu européu?
Anque la sidra nun ye un venceyu esclusivu de la Xunión Europea, el marcu organizativu llímítase inicialmente a la mesma porque:
Ye un espaciu común que facilita’l tráficu de persones y productos ente los Estaos miembros.
Hai una voluntá política clara por parte de la Xunión Europea d’apoyar la creación y desenvolvimientu de Redes de Ciudaes dientro del so territoriu, con presupuestu económicu destináu a esti fin.
Munches de les midíes necesaries pal desenvolvimientu y la internacionalización de la sidra y la mazana tienen un marcu européu común.
Yá esiste un venceyu importante ente los Estaos miembros de la UE nel sector de la sidra y la mazana, tantu en rellaciones comerciales como culturales y d’eventos.
¿Qué oxetivos tien Cider Cities?
Los que figuren nel protocolu d’adhesión que s’axunta a esti documentu.
¿Qué beneficios apurre Cider Cities a los sos miembros?
Facilitar la consecución de los oxetivos que figuren nel protocolu d’adhesión.
Favorecer el desenvolvimientu del sector de la mazana y la sidra y del turismu vencelláu a ellos —sidraturismu.
Aportar esperiencia nel diseñu, desenvolvimientu, coordinación y aplicación de proyectos.
Facilitar l’accesu a les ayudes que convoca específicamente la U.E. pa Redes de Ciudaes, bien como líder o como asociáu.
Facilitar l’accesu a otros tipos d’ayudes de la UE nel campu de la colaboración internacional, favoreciendo la participación como asociáu o socios n’iniciatives propies.
Internacionalizar la so presencia nos espacios rellacionaos cola sidra y la mazana:
A traviés de la web de Cider Cities, onde s’arreye toda la ufierta de los socios rellacionada cola sidra y la mazana.
A traviés de les redes sociales específiques de Cider Cities y de los sos socios y collaboradores.
A traviés de los medios de comunicación especializaos que formen parte de Cider Cities (como la revista mensual LA SIDRA, la web lasidra.as, ente otros).
Facilitando la posible participación nos eventos organizaos por Cider Cities y los sos miembros.
Facilitando información en tolos eventos nos que participe Cider Cities.
Facilitando presencia internacional nos eventos que pueda organizar cada miembru.
Collaborando na realización d’eventos internacionales o con presencia internacional, gracies a la esperiencia acumulada pola Fundación Asturies XXI depués de más de 15 años organizándolos.
¿Quién pue formar parte de Cider Cities?
Les entidaes municipales y/o rexionales que lo soliciten y cumplan los requisitos que más abaxo s’espongan, ensin esixir nengún requisitu previu específicu más allá de la voluntá de desenvolver la mazana y la sidra nel so territoriu y como venceyu de rellación col restu d’entidaes que formen parte de Cider Cities.
Tamién se van poder facer convenios específicos con otres entidaes públiques o privaes interesaes nel proyectu, pero ensin adquirir la categoría d’asociaes.
¿Cómo formar parte de Cider Cities?
Pa formar parte de Cider Cities ye necesario:
Compromisu políticu d’adscripción a Cider Cities, espresáu por acordu del órganu competente.
Tener ellaboráu un análisis de situación y un plan d’actuación o’l compromisu d’ellaboralos.
Designar un responsable como interlocutor.
Aportar una cuota d’ingresu y una aportación añal en función del númberu d’habitantes representaos pola institución llocal o rexonal.