CIDEREU: Los ciudadanos europeos xuníos pola cultura de la sidra y la mazana
Resume del proyeutu
CIDEREU (Citizens united for Intangible heritage of apple and ciDEr cultuRe in Europe) ye’l resultáu d’un procesu de collaboración que se foi consolidando a lo llargo de los últimos años ente diverses ciudaes y rexones europees que comparten una mesma herencia: la cultura agrícola, social y económica vencellada al cultivu de la mazana y la producción de los sos derivaos, especialmente la sidra.
Lo que comenzó como una serie d’intercambios, alcuentros y venceyos ente territorios con raíces comunes evolucionó hasta tomar forma nun proyeutu européu que xune a diez ciudaes de seis países (España, Francia, Italia, Portugal, Eslovenia y República Checa) nuna rede de cooperación que apuesta por un futuru más sostenible, inclusivu y participativu.
Enmarcáu dientro del programa CERV (Citizens, Equality, Rights and Values), CIDEREU busca reforciar los venceyos culturales, sociales y económicos ente les comunidaes rurales europees, fomentar la participación ciudadana, promover la igualdá ente muyeres y homes y poner en valor un patrimoniu inmaterial que ye, al empar, memoria viva y motor de desenvolvimientu sostenible.
La declaración de la Cultura Sidrera Asturiana como Patrimoniu Cultural Inmaterial de la Humanidá pola UNESCO nel 2024 dio-y al proyeutu una nueva visibilidá y reforzó’l so sentíu: reconocer que esti llegáu nun-y pertenez solo a una rexón, sinón que forma parte d’una historia europea compartida que merez ser celebrada, protexida y tresmitida a les xeneraciones futures.
Oxetivos
-
Calteneer y poner en valor el patrimoniu cultural inmaterial vencelláu al cultivu de la mazana y a la ellaboración de sidra y productos derivaos.
-
Impulsar la participación ciudadana y el diálogu européu, reforciando’l venceyu ente ciudadanía, patrimoniu y sostenibilidá.
-
Promover la igualdá de xéneru, visibilizando’l papel de les muyeres nel sector agrariu y nes tradiciones rurales.
-
Fomentar el releu xeneracional, acercando la cultura agrícola y sostenible a les nueves xeneraciones.
-
Contribuyir a la transición ecolóxica europea, promoviendo práutiques agrícolas sostenibles, economía circular y consumu de productos de quilómetru cero.
Destinatarios principales
-
Agricultores y productores locales venceyaos al cultivu de la mazana y la sidra, con especial atención a les muyeres del sector.
-
Mocedá y estudiantes de primaria y secundaria, al traviés de talleres y actividaes educatives que promuevan valores de sostenibilidá, igualdá y participación.
-
Autoridaes llocales y responsables políticos, fomentando l’intercambiu de polítiques públiques sostenibles y l’escucha de les comunidaes rurales.
-
Ciudadanía en xeneral, que podrá conocer la riqueza cultural y simbólica d’esti patrimoniu compartíu.
Por qué esti proyeutu
Nun contestu de despoblación rural, enveyezu del sector agrariu y perda del patrimoniu inmaterial européu, CIDEREU naz pa revalorizar l’agricultura tradicional como motor d’identidá, sostenibilidá y cohesión social.
La cultura de la mazana y la sidra, presente dende los tiempos de Carlomagnu, convírtese equí n’un ponte ente xeneraciones, territorios y valores europeos compartíos.
Lo que se va facer
A lo llargo de dos años, CIDEREU va organizar una serie d’alcuentros internacionales, esposiciones, talleres y actividaes educatives nes ciudaes participantes.
Van celebrase tres grandes eventos europeos (n’Italia, República Checa y España) pa intercambiar esperiencies y espublizar los resultaos.
Va haber esposiciones fotográfiques y talleres sobre’l papel de la muyer na agricultura, amás de talleres participativos, onde se fomentará l’intercambiu d’esperiencies ente los distintos territorios y se recoyerán recomendaciones europees orientaes a promover polítiques rurales más sostenibles, igualitaries y participatives.
Van desenvolvese programaes escolares pa sensibilizar a la mocedá sobre la importancia del patrimoniu rural, la igualdá y la sostenibilidá.
Y va promovese l’ampliación de la Rede Europea de Ciudaes de la Mazana y la Sidra, que garantizará la continuidá y espansión del proyeutu más allá de la so duración inicial.
Paquetes de trabayu
WP1 – Coneutando cultures: puntu de partida
Coordinación: Trames Onlus (Italia)
Esti primer paquete de trabayu marca l’entamu del proyeutu.
Organízase un gran alcuentru internacional n’Italia, onde toles ciudaes socies presenten la so historia y rellación cola mazana y la sidra.
Durante dellos díes, van compartise esperiencies sobre trés temes principales:
-
El papel de la cultura sidrera nel desenvolvimientu rural.
-
Cómo la mazana y la sidra pueden sofitar la sostenibilidá agrícola n’Europa.
-
El papel fundamental de les muyeres nesta tradición.
Esti eventu inaugura la rede CIDEREU y siente les bases pa les actividaes futures.
Amás, coincidirá con una fiesta llocal de la mazana, lo que permitirá la participación abierta de ciudadanos, productores y mocedá.
WP2 – Muyeres, cultura y sostenibilidá
Coordinación: Municipiu de Carrazeda de Ansiães (Portugal)
L’oxetivu d’esti bloque ye visibilizar el papel de les muyeres nel mundu rural, especialmente na agricultura y na producción de sidra.
Pa ello, va llanzase un concursu internacional de fotografía, abiertu a cualisquier persona de los países socios.
Les imáxenes escoyíes formarán parte d’una esposición itinerante europea, que va viaxar por toles ciudaes del proyeutu y sirvirá como puntu d’alcuentru pa debatir sobre igualdá, emprendimientu femenín y sostenibilidá.
En cada ciudá van celebrase talleres, conferencies y “cafés del mundu”, onde les mesmes muyeres van compartir les sos esperiencies y bones práutiques.
WP3 – Sabiduría llocal: talleres ciudadanos
Coordinación: Zavod Jnana Bhakti Prada Trust (Eslovenia)
Esti paquete céntrase na formación práutica y nel intercambiu de conocencies.
Cada ciudá socia va organizar talleres llocales sobre cuatro temes clave:
-
Producción sostenible de mazanes y sidra.
-
Usu de materies primes llocales y calidá del productu.
-
Turismu rural y desenvolvimientu territorial.
-
Adaptación al cambéu climáticu y economía circular.
Los talleres van dirixíos principalmente a productores, asociaciones rurales y persones que trabayen nel campu, pero tamién van tar abiertos a ciudadanía interesada.
L’enfoque ye práuticu: compartir trucos, soluciones, innovaciones y esperiencies ente rexones europees.
WP4 – Compartiendo resultaos y aprendizaxes
Coordinación: Mikroregion Chelčicko-Lhenický (República Checa)
Una vegada realizaos los primeros talleres y actividaes, llega’l momentu de poner en común los aprendizaxes.
Esti paquete organiza’l segundu gran alcuentru internacional, aprovechando’l tradicional Festival de la Fruta de la microrrexón checa.
Ellí van presentase los resultaos del concursu fotográficu y los talleres llocales, y van debatise estratexes pa reforciar el papel de les muyeres y la mocedá na agricultura sostenible.
L’eventu ye, amás, una oportunidá pa coneutar con otres rexones europees y atraer nuevos miembros a la rede de ciudaes CIDEREU.
WP5 – Sembrrando’l futuru: educación pa la mocedá
Coordinación: Municipiu de Nava (España)
Ún de los pilares más importantes del proyeutu ye la educación.
Esti paquete impulsa talleres escolares participativos nos distintos países, adaptaos a tres grupos d’edá:
-
6–10 años: xuegos y actividaes creatives sobre la mazana y la naturaleza.
-
11–14 años: debates sobre igualdá, sostenibilidá y alimentación saludable.
-
15–18 años: proyeutos sobre innovación rural, turismu sostenible y polítiques ambientales.
L’oxetivu ye acercar la cultura agrícola europea a la mocedá y facer que se sientan parte d’un futuru rural más xustu y sostenible.
Los materiales creaos nes aules (dibuxos, vídeos, maquetes, idees) van compartise ente escueles europees de la rede.
WP6 – Celebrando y proyeutando’l futuru
Coordinación: Fundación Asturies XXI / Xixón (España)
El postreru paquete de trabayu sirvirá pa zarrar el ciclu con un gran eventu final en Xixón, dientro de les fiestes de la sidra, nes que participen más de 2.000 persones cada añu.
Durante esti alcuentru van compartise los resultaos globales del proyeutu y va redactase una declaración conxunta de bones práutiques pa una Europa más sostenible e inclusiva.